অতালেয়ে খমবিক লোনেয়ো তিন হুরি বঝরত আসাবাদি কবি চাকমা অসীম রায়


Slide1

সুনানু চাকমা অসীম রায়র জনম ১৯৩৮ সনর এপ্রিলর ২৯ তারিঘত দেচহুলোর রাঙামাত্যাত। তা বাব নাঙ অনিল চনদ্র রায় আ মা নাঙ এল ইনদু বালা রায়। সুনানু রায় বঙসা গোঝার হালা হাঙারা গুতথির মানুচ। ১৯৫৪ সনত তে রাঙ্গামাতি হাই ইংলিস ইচকুলততুন মেতত্রিক পাস গরিভার পরে ১৯৫৫ সনত ভারদত এনেই ভারদর নাগরিকত্ত গঝি লোয়েঘি। হামর জিঙহানিত তে এল একজন মাচতর। নানান জাগিত মাচতরি গরি ১৯৯৬ সনত তে জুনিয়র বেসিক ইচকুলোর হেত মাচতর ঈজেবে আজের পা’য়। চাকমা অসীম রায় বানাহ তিবুরার নয়, গদা পিতথিমির আকমলিম চাঙমা কবিগুনোর একজন। এ জাবত তার হন হবিদের বই ননিহগিলিলেয়ো নানান পত্র-পত্রিগেত সয়সাগচ্যা হবিদে নিহগিললোন। অবচ্য ইঙিল্যে তে চোক আ হিয়ের বেসুনজুগে লেঘা-লেঘি গরি নপারের। আমি বেয়ালগরি তার গাগলি গমর ধারাচ গরির। তা লঘে জারহাল্যের এক বেইন্যে তা সানতিপুরোর ঘরর উদোনত পাদিত বঝি উম উম রোত পিতদি হধা হোয়ে কুসুম কানতি চাকমা।

পুঝোরঃ হবিদে হি?

জুওপঃ মুই হধুং চেম, স্মৃতিচারনর গভির মনর ভাবাবেগর একখান অভিপ্রকাচ অহলদে হবিদে। সিয়ান হয়ত রিয়ালিচতিক ওহই পারে বা স্যুররিয়লিচতিগো ওহই পারে। তবে অবচ্যই রিয়ালিচতিক ওহক বা স্যুররিয়লিচতিক ওহক সুওত রোমানসর তা’চ থেই পেভই।

পুঝোরঃ তুই হমলততুন ধরি হবিধে লেঘা আরমভ গচছোচ?

জুওপঃ ৬৪ সনত, জেককে মুই বেসিক ত্রেনিঙ কলেজত সেককে মুই পতথম কলেচ ম্যাগাজিনত বাংলা হবিদে লেকখোঙ। হবিদেভুও নাঙান হি মনত নেই, হিনতুক হবিদেভুওত ‘সন্ধ্যার আগে ঝিলিমিলি’ ভিলি একখান হধা এল। তে ৬৮ সনত মাচমারাত চিগোন একখান সভাত মুই পতথম চাঙমা হবিদে পচছোঙ। সে হবিদেভুওর এককো-আততো লেইন আহলদে, “আমি আহবঙ ধার তাগলান/রেদোত নঅহলে পত্যা আমল্যা।” হবিদেভুও অবচ্য বর দাঙর নয়, তিন-চের বা চের-পাচ লাইন্যা। দলক পত্রিগেত পতথম মর চাঙমা হবিদে সাবানা অহয়।

পুঝোরঃ তর চিগোন হালর হধা হিঝু আমি সুনিবার চে’ই।

জুওপঃ মর জনম ওহইয়ে রাঙামাত্যার রাচঘরদই। রাঙামাত্যা চাঙমা রাচঘরদই। চাঙমা রানি বিনিতা রায়ই মর এই জে ‘অসীম’ নাঙান, মর নামকরনর সময় তেয়োই বুঝেই দেদে। তে’ জেককে এককেনা বো’ই পারঙ, সুননোঙঙে সেককেততুন ধরি মর আততেভুও চিগোন রাজা রমনী মোহন রায় মরে তা আধুগুনোত বঝেনেই বঝেই তার বেগ দাঙর নাদিননো হেনেই হেই ‘থম থম দি-থম, থম থম দি-থম’ হোনেই অনসুর নাজেদ। সিততুনোই ওহইয়ে মর হেহললে দাক নাঙ ‘দিথম’ ভিলিনেই জেরে জেরেনধি জানি পাচছোঙ। হিততেই ভিলিনেই সিধু মর ইততো হুদুমুনে ‘অসীম’ততুন ‘দিথম’ ইজেবেই বেচ চিনোন। চিগোনততুন ধরিনেই আলোলো-দুলোলো গরিহ জেদেঙাঘুন, হরোঙাঘুন, পিজেঙাঘুন ইগুনোর মেয়েই মুই দাঙর ওহয়োঙ। বেচ গরিনেই গরিহ চিগোনততুনধরি মততুন বয়জে বেচ অহলেয়ো ত্রিদিপ রায়র দাঙর ভোন অমিতি-র নোনেই ললচ-পলচত অধিনত থেনেই থেই মর কৈসোর জিবন অতথাত মেত্রিক পাচ গরানা পরচনত বিদি জেয়ে। মুই মেত্রিক পাচ গরানার পরবরতি সময়দো ত্রিদিপ রায় আ তা মোক রানি আরতি দুওজনে মরে হুপ হোচপেধাক।

পুঝোরঃ চিগোন হালর হন বারাহ-তারাহ গরানাহর হধা মনত নউধে?

জুওপঃ সে বাল্য হালত জেককে ম বয়চ ১৪-১৫ বঝর, ১৪-১৫ বঝর নঅহব ১২-১৩ বঝর অহবদে সে অকতত ত্রিদিপ দাধা জেহেতু রাজার পুও তা অধিনে আমিহ ২০-২৫ জন তা গুরো ভেই তা উগুমে উগুমে তা লঘে লঘে বেরেই পেধঙ। তা হুঝিপুক উধিলে আমারে জিয়ান পায় হাবেদ, তে’ হুজোক থিক নয়, এককেনা ধেঙ ধেঙ উদিলে, অহলেব নঅহলে আমারে মনে হলে হলে হককেদ। তার মতধ্যে আর সরনিয় অহলদে রাচঘরর দ্রোনকে দ্রোন হুচ্যেল ভুই। জিয়ে তার নেতৃতত হুচ্যেল চুরগরিহ হানাগোই। একদিন হি ওহইয়ে, রাচঘর চেরোহিত্যে জে লিচুবাগান আঘে, গাচছুন এককরে ফেরগেয়ে গরিহ নিজো নিজো, তলছেইয়ে, ভারি অহলে ৩-৪ আহত অজল। সে অকতত দিবুচ্যে ভেককুনে ঘুম জাদন। ত্রিদিপ রায়র দাক নাঙ এলধে চিককু, চিককু দাধার উগুমে আমি ২০-২৫ জন লিচু গাঝ উগুরে উদিলঙগোই। থাজি গরিহ লিচু হেনেই হেই তে’ বেঘ তলর ধেলাগুনোত গদে গদে বঝা বাঝেই দিনেইদি বলে বলে আহগা বাঝেই দিলো। হধা নমানিলে বারি। সে অকতত রাজার’ করমচারি বরদা ভততাচারজোর এলাককে একপাল ভেরা সাগল। ৫০-চুওর হম নয়। সের মতধ্যে ইককো এলধে বিরাত-মোচচোয় লারেই গরিহ পারে পারাহ। সিবে এনেই ধুচ মারিলঘিধে বিজনবালা পোভুও বোচছেদে ধেলাভুওত। তে পলঘি সাগললো পিধি উগুরে, সিততুন মাদিত, তা ঘু-গান উগুরে। ভেককুনে ধরাধরি গরিহ তারে নিলোঙ পো’রভুওত ধোবাললোততেই। আহজিত, হিঝিক-হাজাঘত রাচঘরর অন্যান্যগুনোর ঘুম ভাঙিলে আমারে ধরি আনিলাককোই। বেললেমাধান রাচঘরর সাদ’ উগুরে বিজের অহল। আমি ভেককুন আধি ঘনতা হানতধরি থিয়েই থেই পেলঙ।

পুঝোরঃ সুনানু নিরনজন চাঙমা তর হবিদেগুনোর মুল বিসয় হোয়ে ‘রোমানতিকতা’। হধাগান ত তলবিচত হোততোমান সত্য?

জুওপঃ সুনানু কবি, সাহিত্যিক, প্রাবন্ধিক নিরনজন চাকমা অবচ্যই আমা চাকমা কবি-সাহিত্যককুনোর মতধ্যে বিসিচত একজন। তার সুককো দুরোদ্রিচতির বাখ্যা সত্যতার এচথান রাঘায়। মুয়ো তার সে উকতিঘান সমতথন গরঙ। হিততেই ভিলিনে, মুই নিজেয়ো নিজোরে তলবিচ গরঙ। মর প্রততেককানি লেঘাত এককেনা না এককেনা রোমানতিসিজমর তা’চ এঝে। হিততেই ভিলিনে, মর কৈসোর জিবনততুন ধরিনেই ধরি জৈবন প্রাপতি পরচনত প্রেমঘতিত-তার মতধ্যে দেনা-পাওনা, আঝা-নিরাঝা, প্রাপথি-বনচনা ইয়েনির জে রেচ মনর মতধ্যে সনচিত রোই জেয়েগোই পরবরতি সারা জিবনর মতধ্যে স্যেনির অনুরননর ভাপপানি রোমানতিসিজমর ছোঁয়া পেনেই অভিপ্রকাচ ঘদি জায়।

পুঝোরঃ আমি তর হবিধেগুনোত জেমেন গভিন আসাবাদ তোগেই পে’ই তেমনি হয়েককো হবিদেত তোগেই পে’ই জিঙহানির ধুনধুক। হুভোন তর হবিদেরে বেচ প্রভাবিদ গোচছে, আঝা না নিরাঝা?

জুওপঃ হধ গেলে আঝা। জদি হন সময়ে আমি বনচিত ওহই থেইদে অহয়, মুই কিংবা সমাচ বা দেচ-হাল তে সিয়ানর উবুরে জে একখান ধুনদুক সে ধুনদুককানরে জয়গরিহ পারা জায়নি হন নিরাঝার মতধ্যেয়ো সে আসাবাদি ভাপপান মর মনর মতধ্যে এঝে।

পুঝোরঃ “সবাই-ন-অহলে-অ এককেনা দরয্যা মুই চাঙ্”- ইয়েন আঝলে হিয়োর ধারাচ?

জুওপঃ এই জে সমুতদ্র মুই চা’ঙ, সিয়েন একখান সিমবোলিক ইঙগিত। তা সমারে ইয়েনো বুঝেবাত্যেই চেয়োঙ্গে হি, দরজেঘান অহলদে পিতথিমির সমচত জনধারাগুনোর উতসততুন জেনেই জেই মহান মিলন এচথল। তে’ এ অলপ পরিসরততুন বৃহত পরিসরত লুমনাগোই জে উননোতি আ প্রগতির ইঙগিত বহন গরে সিয়ানরই অনুপ্রেরনা জোগেবাত্যেই চেয়োঙগে মুই। তদুপোরি, মানুঝোর বসতি গরি উদোধে, সিলপ-সঙচথা গরি উদোধে সমচত গাঙর পারে পারে বা সমুতদ্রর পারে পারে। সেই মহা মিলন খেত্রত মিলি পারানা বলতে সমচত দিগেধি জোগাজোক গরিহ তুলোনা।

পুঝোরঃ “পঞ্চাচ বজরর পোবোন গাচচ্য/কজমা অকতর কধা-আনি বুগত বা’-নি/থই ন-পারে নাকসো-ফুলর তুমবাচচ্যান”- হধাগানি কবির হন ভাবনা আরুগর ইজিরে গরে?

জুওপঃ ইয়ান এককান মানে রোমানতিসিজমর হধা। হিততেই ভিলিনেই কৈসোরততুন ধরিনেই জৌবন পরজনত বা জৌবন উততরন গরিভার পরবততি সময়দো মানুঝর মন অত্যনত সুঘর মতধ্যে বিরাচ গরেহ। কিনতু পরবরতি সময়ত জিবনর বিভিনন ঘাত-প্রতিঘাতর পরে পরে ৫০ বঝর বয়জ’ সিননি মানুঝর জাবতিয় জিনিচচানি হিঝু না হিঝু থির ওহই এঝে। তে’ পুনোনি বিদি জেয়ে সে দিনুনোর সিরিতিচারন গরিভারো অকতে অকতে মনে হয়। সে সিরিতিচারনর অভিপ্রকাচততুনোই এককেনা অগমান প্রকাচ পেনেই পে’ই সেয়ান্যে ধরনর সে হধানি নিহগিলি এচছেদে।

পুঝোরঃ আচছা, এবার এককেনা জুদো প্রসঙগ। সুননেই তিবুরার চাঙমা গিদোর জনমর বিজক ভিলে তর গমেদালে জানা আঘে। সে পইদ্যেনে আমারে হিঝু হধা হ।

জুওপঃ ৬৮ সিননি, ৬৭ না ৬৮ গমে মনত নেই, সেককে ঘিলে হাহরা বা পততি হাহরা আয়োজন ওহবার সময়ত ধনিরাম তালুকদারদাঘির ঘর মুজুঙে জেককে আয়োজন চলের সে অকতদই জানঙ নজানঙ গরিনেহই গরিহ সুর ওহক বা নওহক মুই, অমুল্য আ তা ভোন কমলা, আমি তিনজনে মিলিনেই মিলি, রচনা মর, সুরো মর, তারা দি ভেই-ভোনরেয়ো মর সিগেয়ে, সে অনুচথানানত ইককো চাঙমা গিত উতভোদনি সঙগিত পরিবেসন গোচছেই। তালে-ঘাতে থিক নেই, সুর অহঙ-নঅহঙ, তুও আমি গেয়েই। গাননো হানার পরিপ্রেককিদে সে মিলনিসভাগানত ভেককুনে আমক ওহই উদিলাক। মাহ, আহি চাঙমাদিয়োদ গিত রোজেই পারে। সুনোদেদ সেধক হাহরাপ নলাগে। সুর ওহক বা নওহক। গিততো এলধে, “মিলা মরদ গুরা বুরা এঝদে এঝদে, গরিদোং দোল দুনিয়া।” সিয়ান সুনিনেই লগত তগত অভিক কুমারে ধাবা ধাবা তা সরা পারর ঘরানত জেনেই জেই এ সুওত আধা ঘনতার ভিদিরে গিত লিঘি আনিহ, সুর দিনেই, তালে-ঘাদে দো’ল গরিহ গে’ই সুনেলঘি। এই অহলদে চাঙমা গিদোর সুরু। সে পরেধি জোয়ার এল। নাচ এল। নাচ বানাদে আকমলিম এলধে মঙগলধন বাবু। জেরে জেরে এল নাতক। পতথম নাতক ‘সেচ রান্যে বেরা’।

পুঝোরঃ ইককুনু চাঙমা সাহিত্যর আহবাল হেধক্যে?

জুওপঃ মুইধ মনে গরঙ পুরনি আমলত বাংলা সাহিত্যর ৩০-৪০-র কবি-সাহিত্যিককুনোর জে এককান দারুন রকমর উননত এচতরর মতধ্যে লুহঙেগোই থিক সেজান্যে আমার চাঙমা সাহিত্যগানো ইককুনু তেমন ধরনর এচতরত লুহঙিনেই আরেককা আককোই জেয়ে। অনতত আমার চিনতা-ভাবনার বিচয়র মতধ্যে। হিততে ভিলিনে, উততি জে কবি-সাহিত্যিককুন তারার মতধ্যেয়ো জে চেতনাঘান দেঘা জায় সে চেতনার ফলস্রুতি সরুপ তারার জে সাহিত্যর সৃচতি দ্রুত সমসাময়িক আধুনিক, আধুনিকতম ওহবাততেই জার ভিলিনেই আমার চাঙমা সাহিত্য পইদ্যানে মুই মনে গরঙ।

পুঝোরঃ ত নাঙান অসীম রায় চাকমা ওহবার পিঝেদি ভিলে এককান বিজক আঘে। সিয়ান হি?

জুওপঃ তিবুরা রেচজোত জেককে মুই চাগরির অফার পেলুহঙ অফারানত লেঘা আগেধে `Chakma ST Ashim Roy`. পতথম জয়েনর তিন মাচ পরে ধরমনগর ইনচপেকতর অপ ইচকুলোর ওফিস উসা কুথিত বেতন লোভাততেই জেনেই জেই মরে তারা ST ইজেবে বিবেচনা গরিভার গরিমসি গরা ধরিলাক। হিততেই ভিলিনেই মর তাইতেল ‘রায়’। ‘রায়’ তাইতেলধ হন ত্রাইবেলর ওহই নপারে, তেধ বাঙালি। তে’ বাতধ্য ওহনেই ওহই ব্রেকেদত ‘রায়র পরে চাকমা লেঘিনেই দচতখত গরিনেই বেতন লোলুঙ। ও সিততুন ধরিনেই ধরি মর অসীম রায় ব্রেকেতত চাকমা লেঘানা ওহই ওচছে। সে বাদেয়ো এচতি সারতিফিকেত লোভাত্যে আগরতলার দিএম ওফিসত (সেককে তিবুরাত বানাহ ইককো দিচত্রিকত এল) জেনেয়ো ‘রায়’-য়ান লোনেই কুয়েচসন এরাইচ ওহয়ে। মুই বুঝেই হোলুঙ জে, মুই চিএইচতি-র চাকমা রয়্যাল ফেমিলির একজন মেমভার। এলান্যা এসান্যা গরিহ মুই ইনদিয়ান সিতিজেন ওহয়োঙগি। তে’ জদিয়ো তারা মরে এচতি সারতিপিকেত ইসু গচছোন, আনদার প্রভিঝন, মর ফ্রুপ দেঘা পরিবো জে মুই চিকমা রাচবঙসর পুও। তে’ হথাত মর খেয়াল এলধে, ও..মরধ একখান সারতিফিকেত আঘে। ৫৫-ত জেককে মুই ক্যালকাতা এচছোঙ সিততুন ইনদিয়ান পাচপোরত লোনেইলোই ৫৫-দই ইচত পাকিচতান মুই জারনি গোচছোঙ। সে অকতত জাচত খেয়ালবসত মুই হিল ত্রেকতর ততকালিন দিচত্রিকত কমিসনার লেপথেনানত করনেল এল. এইচ. নিবলেত, তাললোই দেঘা গচছোঙ। দেঘা গরিনেই গরিহ মুই জে রয্যাল ফেমিলির একজন মেমভার সেয়ান্যে একখান সারতিপিকেত দিমানত গোচছোঙ। এবং তে মরে, মুই চাকমা রয্যাল ফেমিলির একজন মেমভার ঈজেবে এবং চাকমা কমিউনিতির একজন মেমভার সারতিফাই গোচছে। তার সারতিপিকেতথান অহলদে এককরে মনোগ্রাম লাগেয়ে তার পারসোনাল পেদত। তে’ সিয়ানর বলাবলে আগরতলার দিএম ওপিসত প্রোদিউচ গরিনেই ‘রায়’ অহলেয়ো একজন ‘চাকমা’ ইজেবে ফ্রুপ গচছোঙ।

পুঝোরঃ অরুনাচল, মিজোরাম আ দেচহুলোর চাঙমাগুনোর চাঙমা সাহিত্য চচজার হবর হি?

জুওপঃ মুই মনে গরঙ সাহিত্য চচজার পরিপ্রেকখিদে অগ্রনি ভুমিকাত আঘে ত্রিপুরাই। তার পরবরতি সিলচর, আসাম (ইচতুদেনত গ্রুপ), তারপর মিজোরাম, অরুনাচল খুপ হম সাহিত্য চরজাত নিয়োজিত আঘন। সপচাইতে অগ্রনি ভুমিকা এবং নিচথার লঘে ত্র্পুরাই সে করমধারাঘান পরিচালনা গরিহ জার।

পুঝোরঃ তুই একজন পয়নাঙি কবি ওহবার সমারে সমারে ইককুনু অল ইনদিয়া চাকমা কালচারেল কনফারেনসর অহমা হাবিদ্যেঙ। জধার হাম গরধে তর সাহিত্য চরজেত বেসুনজুক নঅহয়?

জুওপঃ বেসুনজুক ওহবারদ হন প্রচনই নএঝের। সাহিত্য চরজা, সিয়ানদ অহল মচজাগত, ভাবাবেক, সৃতিচারন ইয়েনিরই পরিচফুরন। আর অল ইনদিয়া চাকমা কালচারেল কনফারেনসর বিসিচত করমকরতা ঈজেবে কারজো পালন গরানার মতধ্যেয়ো ওতপ্রেতভাবে সঙচকৃতি, সমাচ, দেচ-হাল, অবচথা ইয়ানির বিসয়ক বিচয়বচতুগানিদই অহলদে অল ইনদিয়া চাকমা কালচারেল কনফারেনসর সুদুর প্রসারি সৃচতিসিল একখান রুপায়ন বা বাচতবায়নর পদকখেপত জরিত থানা। সেই সুবাদে সাহিত্য চরজা আর অল ইনদিয়া চাকমা কালচারেল কনফারেনসর কারজোধারা পালন ইয়েনির মতধ্যে হন বেসুনজুক এভারদ হন প্রচন আঘে ভিলি মুই মনে নহগরঙ।

মাদি, পতথম বঝর, পতথম নাদা, জানুয়ারি-ফেপব্রুয়ারি, ২০০৩।

Leave a Reply

Your email address will not be published. Required fields are marked *